Thursday, May 23

चिकेन स्टेशनमा अखाद्य तेलको प्रयोग

काठमाडौं : राजधानीमा सञ्चालित चिकेन स्टेशन (खाजा पसल)मा अखाद्य तेलको प्रयोग भएको पाइएको छ।

खाद्य प्रविधि तथा गुण नियन्त्रण विभागले शनिबार गरेको बजार अनुगमनका क्रममा काठमाडौं महानगरपालिकाको सितापाइलास्थित चिकेन स्टेशनमा अखाद्य तेल प्रयोग भएको पाइएको हो। चिकेन फ्राइका लागि राखिएको तेल हाई पोलारिटी (अत्याधिक डढेको) पाइएपछि अनुगमन टोलीले सबै तेल नष्ट गरि ३ दिनभित्र विभागमा उपस्थित हुनका लागि पत्र काटेको छ।

त्यसैगरीसँगै सञ्चालित सेल्सबेरी डिपार्टमेण्ट स्टोरका खाद्य सामग्रीहरू पनि गुणस्तरहिन पाइएको छ। फापरको पीठो, पिउने पानी, तेल, जाम लगायत सामाग्री गुणस्तरयुक्त नपाइएपछि विभागले सेल्सबेरी डिपार्टमेण्ट स्टोरको उत्पादन तथा बिक्रिवितरणमा रोक लगाएको छ।

त्यसैगरी, बालाजु माछापोखरीस्थित सूर्यदेव मिठाई पसललाई भने अनुगमन टोलीले सिल्ड गरेको छ। कानुनी प्रक्रिया पूरा नगरि संञ्चालन गरिएको सो मिठाई पसलमा अत्याधिक मिसावट, सरसफाईको कमी तथा व्यक्तिगत सरसफाई पनि सन्तोषजनक नदेखिएपछि अर्को सूचना जारी नभएसम्मका लागि पसल सिल्ड गरिएको विभागका खाद्य अनुसन्धान अधिकृत ईश्वरराज सुवेदीले जानकारी दिए।

उपभोक्ता अधिकार अनुसन्धान मञ्चका अध्यक्ष माधव तिमिल्सिनाले अनुगमनका क्रममा गुणस्तरहीन खाद्य सामग्री फेला पर्नुको साथै सरसफाईमा कमी र कानुनी प्रक्रिया पनि पूरा नगरेको पाइएकाले नियमक निकायले अनुगमन तीव्र पार्नुपर्ने बताए।

खाद्य प्रविधि तथा गुण नियन्त्रण विभागले उपभोक्ता अधिकार अनुसन्धान मञ्चका प्रतिनिधि, पत्रकार सहित राजधानीको बालाजु, सितापाईलालगायत क्षेत्रको अनुगमन गरेको हो। अनुगमनका क्रममा स्थलगतरूपमा नै खाद्य परीक्षणका लागि मोबाईल प्रयोगशाला भ्यान प्रयोग गरिएको थियो।

Leave a Reply

Discover more from खबरगृह

Subscribe now to keep reading and get access to the full archive.

Continue reading